Défoi, désèrtin madam nana in pé tout z’afèr dan zot sak. Kan ou i rogard azot, ou i romark zot i rod, i rod, i rod mèm, sirman pou trouv in n’afèr. Tazantan i trouv, tazantan i trouv pa, mé sa i vé pa dir lé pa la, pars mèm si lé la, lé pa fasil pou trouvé. Antansyon, moin lé pa kont bann madam, mé sé in n’afèr mi romark... nana inn-dé sak, konm di lo kont, sé konm in sak bour-tout dodan. L’èr-la, moin la anvi konpar sa avèk in parti politik.

Mi vé pa dir sé in bour-tout andan, mé an kontrèr, mi vé dir i fo pa lé konmsa. Sirtou dsi la késtyonn z’idé, dsi la késtyonn program, dsi la késtyonn projé, mèm dsi la baz filozofik. I ariv parfoi lé konm sa, é kan sa i ariv, sé konm k’i diré in parti i marsh in pé an dégréné, touléka lé pa an ord pou vanjé. In l’égzanp ? Alon parl la MCUR. Pandan lontan, nout parti la mèt dan son program in mézon konm sa. Mi an souvien pa si sa la provok in gran déba. Moin l’avé l’inprésyon toulmoun lété dakor la dsi, mé kan la rant dann ron pou sa, moin la konm romark in pé té vréman pou sa, in pé lété paré pou abandone lo konba avann mèt an gard, in pé osi té i anfoutsa. Moin la mèm antann désèrtin dirizan apré dir sa la pa in n’afèr ésansyèl. An tou lé ka, ala in parti la fé in gran projé kiltirèl. Ala in parti l’avé lo tan pou diskité, pou tonm dakor lé z’in avèk lé zot... mé kan la gingn promyé kou d’kongn, la troup la dispèrsé.

Ni pouré anparl d’ot z’afèr ankor, konm la rout litoral, lo tram-trin, la défans l’anvironman, dévlopman dirab, la lit pou lé dé gran sèrvis, lo ko-dévlopman, l’otonomi dan l’énèrzi… l’idantité rényonèz, la libérasyon sosyal la done Kréol... Pou kosa mi di sa zordi ? Pars pou in parti, son bann z’idé, son bann projé, zot baz filozofik, sa sé in n’afèr lé inportan, pars oplis nou lé ini, oplis nou lé for. Oplis nou lé ini, oplis nou lé armé pou amèn la batay é pou gingn ali dan l’opinyon bann Rényoné. Ala pou kosa moin la komans par parl lo z’istoir d’sak... in konparézon i vo sak li vo. In pé i di mèm "konparézon la pa la rézon". Solman sa i anpèsh pa moin dir, é la moin lé sir moin na rézon, in parti i pé pa èt in sak pou bour tout dodan. Fransh vérité !

Justin