In pé i pran l’èr aryink avèk la Frans, pou oir kossa lé bon pou nou é kossa lé pa bon pou nou. Pétèt pars l’èr lé méyèr la-ba ; pli sirman pars zot léspri lé anklavé : zot na labitid konfyé lé zot nout déstin.
Nana in bann parti lé konmsa : zot la gingn lo kolonyalism konm éritaz, épi zot i vé pa ronons so léritaz-la. Lé pli fasil, i domann moins l’éfor, suiv lé z’ot k’amènn son prop bato konm k’i fo. Lé pli malizé armont lo kouran, si i fo, plito k’désann !

Poitan, na in bon pé d’moun i pans demoun i rès in landroi, i viv dann in landroi i koné myé k’sak i sort déor sak i fo fé épi sak i fo pa fé dann z’ot landroi.
Byinsir konète, sa i vé dir ou la réfléshi, ou la étidyé, ou i koné kossa la fine déza fé dann péi déor épi ou na réspèk out rasine. I fo galman ou la poin léspri kourt. Donkalor ou nana z’idé dann out tèt, sirtou bon-bon zidé.

Sa lé vré pou dmoun an partikilyé, lé vré pou bann z’asosyasyon, lé vré pou bann parti. Ala pou kossa, pou byin défann z’intéré bann Rényoné, i fo in parti rényoné.
In parti rényoné, mé pa n’inport akèl ! I fo pa inn k’i défann zintéré bann moun nana lo pourkoi an gaspiy. Épi i oubli bann ti-kolon, i oubli la mazorité d’moun, sak lé pa né dann bèrso doré.

Zot i koné, nou Rényoné, ni èm la zistis, ni èm l’égalité, nou la bézoin ossi la rèsponsabilité. Dizon nou l’assé fé lo bèf brankar pou in pé gonf z’ot pla.
Ala pou kossa nout parti lé la, pou kossa sé in parti pa konm in n’ot, vik li lé kominis é rényoné !

Justin