Néna kékzané, l’ariv tout in trikmardaz dsi rogaye sossiss-parétil lo pla rényoné lo pli konu dann lo monde antyé. Zordi ankor sé in n’afèr demoune la pankor oubliyé é tazantan déssèrtin i arfagote rogaye sossiss é mi oi pa kissa i rokoné ali dann in n’afèr konmsa. Astèr souvan dé foi wi oi déssèrtin apré partissipe bande konkour d’kuizine san réspé pou sak i fé konm kuizine issi la Rényon dopi plizyèr syèk.

Astèr mi souètré kant mèm sak i pran linissyativ fé dé shoz konmsa i médite kant mèm in pé dsi kossa i lé in patrimoine é koman lé obligatoire réspèk ali.. Mi rode in lésplikassion sinp dsu lo patrimoine é mi oi lo patrimoine sé in propriété lé transmi par lé zansète.Sak lé dakor avèk sa i dovré dir an koi zot i réspèkt lo patrimoine bande zansète la transmi anou.

An mèm tan zot i dovré rofléshir dsu lo mo sakrilèj pars pou mwin shak foi zot l’apré rovizité, par rapor noute patrimoine zot lé sakrilèj. I pé pa fé ninporte koi avèk sak in pèp la kréé kant mèm.Néna inn sèrtène fidélité lé obligatoir dann sète afèr la !

Nout zansète pou fé noute kuizine la travayé rotravayé, san foi dsu lo métyé zot la romète zot ouvraz pou finir par fé inn an parmi lo méyèr kuizine ké néna dsu la tèr, partikilyèrman dann in pti péi kon m la note.

Mézami lé vré nou la inporté é nou la modifyé mé nou la réspèkte in téknik ki apèl la kréolizassion é sé sak i fé la valèr noute patrimoine kilinèr.. Nou la pa fé ninporte koi, nou la fé in kuizinre an réspéktan noute bande règ la kréolizassion.

A bon ékoutèr, salu.