Matant Zélida la ékrir Justin :

Mon shèr nové, mon spès salté, rouj-de-fon dovan l’éternité… Moin na konm l’inprésyon, tazantan, zot i done plis l’inportans k’i fodré in promès gouvèrnman. Mi rapèl lo dévlopman andojène : na raienk zot la fé in kont èk sa ! Lé z’ot la anvoy dingué. Astèr sé lo dévlopman réèl la mode Hollande. Mèm bann sosyalis i anparl pa, majine pi la droit. Koman i apèl sa ? In l’atrap nigo si mi tronp pa. Kisa lo nigo dann l’istoir ? Dovine, dovinaye ! Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr… Sak ou di la pa pou étone amoin. Pars si lo dévlopman andojène té pa in mové z’idé, sé lo gouvèrnman la pa suiv konm k’i fo ! A sé lo nouvo gouvèrnman k’i vé fé in plan pou shak péi l’outre-mèr pou trap l’égalité réel. Pa an in zour, mé lo tan k’i fo… Nou ni fé pa konmsi arien n’été ; I f opa fèr sa kan l’avnir nout pèp épi nout péi lé an zé. Touléka nou lé konmsa ! Tok ! Pran sa pou ou.

Matant Zélida la di ali ankor dé pti mo :

Zot i oi pa gouvèrnman l’apré balad azot dann grann larjèr. Poitan zot i doizète fini d’shodé kant mèm… dopi k’i pass la pintir dsi zot. Sha shodé la pèr lo fré. Mé zot lé pa konmsa : rotok ! Pran sa pou toi !

Justin la artoush ali dé mo :

Matant si mi konpran bien, i fo pèrd l’éspoir alor ? Fo lès tout tonbé ? Moin mi pans pa konmsa pars inn moin lé pou lo dévlopman mon péi. Dé, mi pans lo dévlopman lé posib. Nou na zatou dann nout min ! In patriyot rényoné i pé pa koz otroman. Retok ! Pran sa pou ou !