Pou komansé, in késtion pou bann Ti-Kolon : Kosa la goumante sèt foi édmi rant 1995 épi 2007 ?... Non va ! la pa lo kout-la-vi ! La pa lo SMIC non pli ! M’a di azot kosa, sé larzan pou fé la fèt, resoir d’moun, ashté la boustifay, voiyazé, alé an shanjman d’èr pou Jacques Chirac. Konbien sa i fé : dé troi shif dovan épi in bon pé zéro déyèr, à la droit bann shif. Épi pèrsone a ski paré na poin lo droi di arien ! Donkalor, nou lé kontan.
Nout kontantman la pa ankor fini, akoz lo prézidan ki vien la pa mal non pli : Li la parti in seminn shanjman d’èr. Pou sa li la pran in laviyon privé : karant mil ero, in zoli bato pou in seminn dë san mil ëro par la. Kisa la pèy sa ? A s’ki prétan, sé in kado in miliardèr la fé ali. Boug-la i apèl Vincent Bolloré. Zot i koné pa li ? Moin non pli (ni ashté pan out pil plat dan lo minm boutik), mi antan son nom dann la bourse. Saint Cac karant, priyé pour nou ! Kisa la di nout nouvo prézidan lé pou lé rish ? La pa vré ! Lé rish lé pou li ! Anfin, inn lé pou l’ot, l’ot lé pou inn épi pandan stan-la kabri i manz salad !
A, Johnny Halliday i rant an Frans, vik Nicolas la gingn zéléksion. Ala o moins in pti bout blé dann in sièl noir, in pë de tandrès dan so mond dë brit.

Justin