Zot i koné souvan défoi néna désèrtin la anvi in n’afèr ou néna. Kisoi in zanimo bien korporé, kisoi in gayar mézon out famiy la kado aou, kisoi mèm out madam sirtou si èl lé plézab é si èl i port zano béni dsi son doi. L’anvi, la zalouzi, lo dézir sa sé bann santiman dir pou kontrolé. Mi koné in jenn marmaye, sa lété amouré konm in shien pou in po d’patat pou in madam maryé é si tèlman amouré son famiy té i pans demoun l’avé aranj ali. Tan k’a lo marmaye li l’avé konm la pépie : pi l’anvi d’manzé, dolo in dégou mèm, nuit konm zour li té i pans madam la. Kan in n’afèr konmsa i ariv, pa toultan mé rant rant na konm in mové l’èr dan lé zalantour é movèz shoz i tard pa pou arivé. Si bann pon té kapab rakonté sak zot la vi, é sak la éspas l’androi zot i lé, zot noré dé shoz pou dir. Pars amar lo kèr avèk in n’afèr d’moun i fé pa bien pèrsone. Alé ! Mi lèss azot rofléshi la dsi é ni artrouv pli d’van sipétadyé.