Si moin té i bénéfisyé la prime COSPAR, si moin téi gingn RSTA, mi pé dir azot moin nora été trakasé. Pou kosa ? Pars, manyèr minis Lurel i di, i arsanm inn konm l’ot lé mal asiz. Dabor lo boug i di, bann prime-la sa la pa définitiv, momandoné sa i doi arété. Aprésa, li di li la zamé di li téi sar arète sa, mé li ardi sa z’afèr la pa fé pou dir toultan. Arzout èk sa, li di demoun la pa bien konprann ali pars li vé pa k’i siprime mé solon li in zour sar blizé rovoir lé shoz.

Pou moin, mi diré lo poi bann prime lé o-fé... Sof, si in gro dézord i pète ! Si i bouz pa, lé o fé ! Si i bouz pa tro, lé o fé ! Touléka, sé sak mi konpran é moin na konm l’inprésyon na in bonpé dmoun la konpri lé shoz konm moin. Poitan, si mi tronp pa dann la loi "vanj kont la vi shèr" gouvèrnman la bien di la vi lé sinkant-sinq pour san pli shèr ké dan la France. Si lé sinkant pour san pli shèr ké dan la france, mi pans in gouvèrnman k’i réspèk l’opinyon i doi tienbo kont in n’afèr konmsa. Sirtou ké si i mète an konparézon lo koutan la vi, é lo bann rovni, ou i apèrsoi bien na in n’af-èr i kol pa pou plis la moityé la popilasyon, sak i viv dsou pa d’port la mizèr. Dizon sak i tir lo dyab par la ké.

Mi antan in pé i di, gouvèrnman si li vé, li pé prann inn-dé désizyon pou fé arkil in pé la mizèr. Koman ? Bin bann minima sosyo sé li ki fiks sa. In n’ot légzanp ankor ? Lo SMIK, sé gouvèrnman i déside sa. Bin li na ka désidé ! ... Bann mové lang va di : antansyon lo poi la dète ! Antansyon lékonomi lé riskab ète an rokil. Dakor lé ga, mé kisa l’otèr si bann bank la dékoné ? Kisa l’otèr si gouvèrnman Sarkozy la déside diminyé z’inpo pou bann rish ? La pa bann ti kolon la fote. Ni pé dir osi kisa l’otèr si bann gouvèrnman, dopi plis sinkantan la mète kal dsou la rou nout dévlopman. Antansion, na in pé i komans di, i fo shanj lo shanjman. Sa la pa in bon sign ditou !

Justin