Zour-la nou la aprande gouvèrnman komor téi aksèpt pa oir bande bato franssé débarke dann in por komorien trant-sis komorien paré t’il lété pa dann in sityassion légal par rapor la loi kolonyal franssé...

Zour-la nou l’aprande galman in tribinal Mayotte-donk franssé-la défande dékaze-donk kass la kaz- in paké d’moune dann Mayotte, pars té riskab mète dann danzé in bonpé zabitan dann in bonpé banga an suivan la métode zé d’domino.

Nou la vi ossi dann télé bonpé jenn mobilizé konte le l’opérassion dékazaz, épi ékspilsyon bande rézidan ilégal solon la pratik bande franssé-antanssion mi di pa la loi franssèz, pars la loi franssèz néna arien a voir ladan pou plizyèr rézon ni pé oir firamézir.

Mézami mi konpran ké bande ékssité la pa apréssyé in sityassion konmsa si tèlman -pou dé rézon k’i apartien azot- zot lété a-fon pou le lopérassyon Wambushu é son réissite, si tèlman zot téi panss sa téi doi pass konm in lète a la post. A tro mépriz l’ènmi déssèrtin i fini par tronpe azot zot mèm.

Mé lé pa pars ou lé ipèr ékssité. Lé pa pars wi oi in lopérasion sopidizan loi apré foiré ké wi pé di sak wi di, sirtou de la par d’in vis-prézidan konsèye départmantal. Sé konmsa ké dann télé Mayotte, nou la antande In mésséyé Salime Mdéré apré insilt bande komorien é sirtou apré di : « mi panss i fodré pétète tyé inn, é mi pèze mon mo i fodré pétète tyé inn. »

La zoinalist la koupe ali lo mikro-mèm si èl la lèss d’ote di bande kozman skandalé.. Apré 24 èr li la di, son parol la dépass sonn panssé mé mi doi avoué mi koné pa son panssé é miprézime la pa sirman in modèl de purté d’panssé.

Antouléka sa la éklèr mon zidé dsu kékshoz :Konm bonpé d’moune mi poz amwin késtyon dsu sak Mwambushu i vé dir. In pé la di, sa i vé dir sirman « tyé azot » ébin oila k’lé klèr pou in foi .

A bon antandèr, salu