Somenn k’i vien, tout bann komine La Rényon-i fé 24 an tout-shakinn nora son mèr, é shakinn nora son konsèye minisipal. A partir d’la shak mèr é shak konsèye nora son moiyin pou moiyéné-dizon son moiyin pou okip lé zafèr son prop komine. Mé antansyon :

Dabor inn bann komine épi zot popilasyon isi La Rényon néna in gran kantité problèm : tout lo bann problèm i pé zète in roflé nout mal dévlopman, in dévlopman mal ékilibré. Arzout èk sa bann komine, dopi dé-troi zané, zot moiyin la diminyé ankor, pars sé in n’afèr bann gouvèrnman dopi Sarkozy, an pasan par Holland é ziska Mésyé Macron la désid konmsa.

Dézyèm zafèr, moin la di épi mi répète, lo péi donk son bann komine lé mal dévlopé, donk lé pa étonan ké lo zinpo i rann pa bien dann la plipar d’komine é si i rann pa bien, sa i vé dir, néna moins moiyin pou moiyéné.. ; Arzout èk sa le loktroi d’mèr osi i rann pi tro bien é anpliské sa i di sa i doi disparète.

Alor, mé zami, mi vé pa tro dékouraz azot-dékouraz amoin osi - mé konm in pé i oi sa konm la poul i ponn zèf an or, mi pé dir azot : kont dési é fyé pa tro, é anplis majine in pé lo kozman moin la mark dann zoinal lindi k’i di konmsa : mon dyé ségnèr, lo tré o, donn anou in moun i konpran anou, plito k’in moun i fé anou in bonpé kado.

Alor, si zot la vi dann télé lo vinn-kat figir lo mèr zordi, ébin si zot i pé, atann sizan passé épi apré konpar lo bann foto, é moin lé sir zot va di s’mond-la i rajéni pa é pétète zot va profèr zot ka plito ké lo ka d’banna.. Mé in bon kamarad la di amoin :’K’i bate di bèr lish son doi ! ».alor lé ga, fé konm zot i san mé obliy pa fonnkèr Paul Verlaine kan i di : « Demoun i di, trist konm la port in prizon, é mi kroi, lo dyab m’anport, zot na rézon. ».