Médam zé méssyé, la sossyété, koz èk mwin sé koz èk in kouyon, mé sé opyé d’lo mir k’i oi lo masson.

Mézami, zélékssyon sa in drol d’afèr sa : néna bande fidèl dé touzour, oui ! Mé néna ossi sak i vir la moke- i di ossi « dévir la moke ». Mé i pé di ossi « i dévir palto » antouléka sa i vé dir la shanj parti sansa la shanj kandida.

Mon papa la touzour rakonte amwin in zistoir. Zistoir i fran kominis é kan l’ariv zélékssyon mon papa la fé son tourné lo soir pou oir si son band fidèl lété o randévou k’i falé pa manké. Donk la pass shé lo boug mi di azot té in fran kominis é li la di solman : « Touzour dakor intèl ? » é intèl la fé pou réponss : « konm par l’passé ». Mé landomin lo moune té fine dévir palto. Oé s’fèr li té fine déviré dopi l’passé.

Alé ! Mi kite azot rofléshi la dsu é ni rotrouv pli d’van.Sipétadyé.