Dopi dèrnié zéléksion, Sin-ni néna in nouvo mèr. Kass pa la tète, sa i apèl l’altèrnans : inn i sava, l’ot i vien. In n’ot foi va fé la mèm shoz dann l’ot sans, mé kansa va shanj in pé manièr ? Mi vé dir, kansa va pèrd so mové labitid kassé sak l’ot la fé avan. Kansa nora in pé la “kontinuité” ?

Fé in vil, aménaz ali, prépar lavnir, sa i fé pa shak siz’an, sa ! Sa i mète lo tan : nana dé foi, pou fé lo dossié, pou rod lo larzan, pou bien kalkil sak nana pou kalkilé, i fo siz’an. Alor, si la shanj mèr, si li dévir lo do sak la fé avan, alor dizon la vil la pèrd son tan, demoun la pèrd z’ot tan, épi konbien larzan la gaspiyé !

Agard in pé kossa la Réjion i fé ? Son bann projé i port déssi talèr vint’an. Konmsa mèm i gingn fé in n’afèr k’i dir, in n’afèr solid. Lo mond la pa fé an in zour : la pa bézoin sort politéknik pou konprann in n’afèr konmsa. I fo an avoir bon zidé, épi travay, travay, ankor travay !

Pou lo rèst, pou la proksimité, lé touzour possib pa fé konm sak ou i pran la suit. Kroi amoin, nana pou fé dan la proksimité : bann sèrvis pou la pèrsone, kisoi famiy, zanfan, vié moun, léspas vèr, landroi pou promné, lékol pou aranzé. La pa di gaspiy larzan, la di dépans ali konm k’i fo. Mé siouplé, i fo in pé lanbision pou nout kapitale. Lé vré, la pa vré ?

Justin