Bann éspésialis i di, pou lo lékonomi an zénéral, lé pa tro bon, lo pri lésans i désann tro ba, i prétan néna in lésplikasyon pou sa, mé pou mwin sinp konsomatèr, sé in bon nouvèl. Dopi kèk tan lo pri lo baril i bèss in pé é i kontinié bésé ankor zordi, minm si pou in pé shové i amay, anou, ni dwa pa souplingn a nou pou in fwa, mé in nafèr mi konpran pa tro, kan lo pri pétrol i goumant, dopi lo tan i goumant ? Dan lélan i profit touzour pou goumant tout é a so moman la i di lo pri i flanm, donkalor la i aranz a zot pou fé flanm tout ansanm, vik bokou d’shoz i dépann lo pétrol, a s’ki paré, o kontrèr kan lo pri i bèss, lé rar, mé tanzaot i ariv a bèsé, é la i ral lo trin pou fé d’sann an ba lo pri.

Parlfèt, zordi i bèss é poukoué mi di sa ? Prann lékzanp sinploman si lo biyé pou vwayaz dann lavyon. Mi parl pa pou loto, pou loto, lésans la bèss inn ti ging, mi parl ryink pou lavyon. Konm lo prézidan la rézyon, li lé li minm-minm prézidan isi, prézidan la ba, prézidan la rézyon, prézidan la sématra, prézidan la konpany lavyon, ali minm i dwa gingn règ tousala, san pran lèr èk pérsonn, vik li di partou li vé fé vwayaz a nou gratuitman èk nout larzan, lokasyon lé bon pou li, pou fé pou vréman. Anvoy a li pou fé bèss lo pri biyé, ni atann, la fin d’lané i tonm bon.

Vik li lé tousala an minm tan, é konm i di li sousié bokou pou fé vwayaz rényoné (tronp pa zot, li sousié pa pou son zéléksyon). O lièk domann souplé létat touzour ousinon sa détourn larzan larmé, komans par diminié lo pri biyé lavyon. Li ging fé sa vitman, la si li vé toudsuit, i sifik lo prézidan la rézyon i intérvyin opré d’lo prézidan la sématra é ké li minm li domann lo prézidan la konpany lavyon èr ostral.I dovré alé vit, kip é anpèsh a li ? li gingn fé sa sontousèl minm zour vik li désid dé tou, li pass partou konm i di, boudikont li règn si tout, mé souvan-dé-fwa, konm bann vié i rakont « In pé langré i nouri, tro langré i bril »