Sak i lir noute zoinal Témoignages i koné sa dopi lontan.

Mé oila dann zot ropriz néna in n’afèr zot i obliye a mwinss ké zot la pèr sa i korsh zot boush, amwinss ké zot la pèr bann réakssyonèr épi l’éta li mèm i mète in kou d’aré. Biensir mi vé anparl in n’afèr sèryé ni pé apèl sa konm ni vé, mé sé lo pouvoir pou lo pèp rényoné gouvèrn ali par li mèm dann bann séktèr inportan… apèl sa lotonomi politik, apèl sa la rovandikassion d’in pèp majeur, apèl sa noute majorité, apèl sa ankor noute souvérènté… di d’ote nom si zot i vé mé antouléka sé lo droi pou bann rényoné okipe zot prop zafèr san prann lé z’orde an déor.

Poitan, fransh vérité, toute noute bann rovandilkassion lé inportan, mé lo droi désside par nou mèm dann sak i intérèss anou mèm, fransh vérité sé lo pli inportan é san li toute lé zote rovandikassion sar in manyèr koz solman la boush rouvèr, san trape noute bann rovandikassion lé kapital pou noute l’intéré. Lulu Biuedinger téi di souvan : kissa i komann noute péi é pèrssone i pé pa di anou sa la pa in késtyon fondamantal !

Mézami, shak kriz internassyonal kissoi dann loséan indien, kissoi d’ote koté i mète anou dann difikilté pou noute otosibzistanss, par l’fète ké ni pé pa pran bann déssizyon k’i fo, lo moman k’i fo é bann moune déor la pran toute kalité déssizyon lé pa dann noute lintéré, mé dann lintéré lo sistèm néokolonyal épi son bann profitèr.

In légzanpe : lotonomi dann l’énèrzi. Madame la Prézidante l’assanblé nassyonal lé kontan pars ni marsh dann la dirékssion d’in lénèrzi prop… Nou ossi nou lé kontan, mé ni apèrssoi sa sé in manyèr goumante noute dépandanss par rapor bann moune déor é kan v’ariv in kou d’trafalgar sé nou k’sar frite konm la mori frite.

A bon antandèr, salu !

Justin