Issi, dann La Rényon, i antann souvan-défoi demoun i sort déor apré ésplinn pars d’apré zot nana préférans pou dmoun lé éné issi ; dizon pou bann Rényoné par la nésans. Nana k’i di lo kontrèr, i di konmsa bann moun i sort déor lé plis privilézyé.
Konm di in lémissyon dann télé : na pou diskité. Mé zordi, moin la poin l’anvi parl an zénéral, mé solman rakont in zistoir, in moun i sort rakont amoin.

Li la kass son motèr, donkalor li lé dann l’obligasyon ashté in nouvo kok-loto. Sé dé shoz k’i ariv, é kan i ariv i fo ou i rode in krédi la bank, in mézon krédi, sansa mèm in l’asirans. Moun mi koné la parti oir son lasirans épi la d’mann ali konbyin li gingn la monant o moi, konbyin krédi li pèy. Finn kont, la rouvèr in dossyé pou li, épi lo boug té i rosovoir ali, la di lé bon. Li fé tourn la mashine ép li n’ora in bon répons. Mé ala pa k’in pti limyèr i mète a klignoté : sirpriz ! sirpriz ! Son dossyé i pass pa, pardon-éskiz !
Le boug i di ali sé pars li lé né dan l’outré-mèr é sa in kékshoz i blok bann dossyé. Astèr, i rèss ali aryink pou alé in n’ot koté, banna i aplik pa so paramète-la !

I prétan dir dépi in koup de tan, nout bann konpatriyot dan la Frans i gingn koudzok konmsa. Konm di lo kont : tout demoun lé égal dan la Frans, mé in pé lé moins égal ké d’ot. Fransh vérité !

Justin