Lé byin domaz oir in n’afèr konmsa. Dépi toul-tan la foré Maïdo i bril, la pa vi lo prézidan lo park lé-o, la pa antann ali in sèl foi, li la pa okip lo térin médyatik !Kansréti in kominiké, sa lété possib épi bann média noré bate tanbour la dsi. Konm zot i fé shak foi lé possib mète in moun la droite anlèr. So foi issi, aryin ditou !

O pyé d’le mir, i oi lo vré masson !
Poitan, la-ba dann Brézil, lo prézidan té la. Li la mèm fé in paké zéstikilasyon, bate maloya. Épi, arzoute èk sa, li la fé rosovoir ali, an grann pomp par déssèrtin moun Bras-Panon. Li la fé mète z’afish dan la komine, in gran pintir déssi l’éstade. Sé konm k’i diré lo boug lété désidé mèm pou mète lo park anlèr. I paré sé dann bann sityasion grav k’i oi la valèr d’moun. Kan na poin danzé, toute demoun lé brav. Kan nana danzé, lé pi parèy. O pyé d’le mir i oi lo vré masson !

I lèss bann mazistra a la komann !
Dann sityasion grav-la, i fars pi, i zéstikil pi, lé pi parèy é l’èr-la, i lèss bann mazistra fèr. Sé zot k’i koz. Sé zot k’i asplik. Sé zot k’i komann. Pandann tan-la, Rényoné ousa i lé ? Kèl rol li zoué la-dan ? Kossa ! Nout léspri lé tro anklavé. Moin lé mèm sir dann bann landroi ousa i pran bann gran désizyon, in pé i doi pa mank abès anou ankor in pé.
I fo dir ossi, inn-dé té i mazine zot té lo roi. Lo roi ? Non, zot lété lo boufon, solman lo boufon.

Justin