Mézami, si i annye pa zot tro, mi yèmré parl azot in pé lo kovid. La pa pars mi konpran myé lé shoz ké désèrtin moun otorizé par zot mèm pou anparl sète afèr-la ; Mèm si moin noré in l’opinyon la dsi, moin na poin lokazyon di mon l’opinyon é pou moin sa lé konm in par(fé kont lo déguizman la vérité.

Kèl vérité o fète ? Mézami, si zot lé dakor avèk moin ni pé dir ni koné pa granshoz dsi lo l’ènmi invizib. Sèl zafèr ni koné, sé koman zafèr-la i éstrèss anou é koman li l’apré malade tout bann popilasyon : nou maladé avèk sa ! An parlann maladé, néna i ansèrv sa pou fé viv dann la pèr in takon d’moun. Néna in pé i ansèrv sa sinploman pou ramass mantèr.

L’èrla, mi rogard in pé déyèr é mi mazine lo tan d’sida kan bann médsin téi i di anou sesi, téi di anou sela, téi di anou antansyon la bav inn, antansyon alé kabiné shé l’ot, boir pa dann mèm vèrre lé z’inn épi lé zot. Anfin tout in bann balivèrn désèrtin lété vré, épi d’ot lété pa vré ditou.. Sa i fé pans amoin osi lo tan chikoungounia, lo tan téi konfine pa, lo tan téi prosévèrbal pa, mé san prévnir la maladi téi tonm dsi ou par l’intèrmédyèr in sinp piké d’moustik tigr.

Mé kan mi rofléshi, moin néna konm l’inprésyon bann maladi-la i trap pa késtyon baratin vré sansa fo nout mézavantir dann kovid 19. Mi di dann mon kèr kan sar fini-kansa mi koné pa - sré bien itil bann zistorien i fé zot roshèrch pou rakont tout la kouyonis bann moun otorizé la rakonté. Mi pé déza donn azot in titr pou zot roshèrch : i pé di par ébzanp « Listoir in kouyonis téi apèl kovid. » Mé biensir, désèrtin va di : i pé koz konmsa zordi ! Lé fasil rakont sa kan la fini.