Néna pwin lontan solon in lankète l’INSEE in tyèr bande jenn épi bande zadilt — rant 16 épi 25 zané l’avé disparète bande radar lanploi, lo pol-anploi, lékol, osinonsa ankor la formassion proféssyonèl. Donk zot i bénéfissyé pa arien é final de kont pèrsonne an parmi bande zinstitision i koné azot. Lé for pou in péi i koné la modèrnité konm nou !

Ala ké so matin, so kou issi dann zoinal parlé i anons touzour an parmi bande rényoné rant 16 épi 25 zané inn dsu dë k’i rode travaye i trouv pa. Romark’azot bien, mèm dan La franss an zénéral voyan lé o rouz pou katégori-la, mé néna rouz é rouz pars laba dan la frans 18,5 % bande jenn na poin trav aye. Lé ankor mwin pir k’issi La Rényon.

Alor mwin lé sir zot i doi domandé pou kossa bande voiyan o rouz konmsa ? Mi koné néna plizyèr rézon, mé antouléka néna inn é sa mi panss pa i pé raporte amwin la prèv kontrèr é sa néna rapor avèk noute tré pé d’dévlopman an partikilyé an parmi bande fors prodiktiv.

Mi sava pa site azot bande shif-la pars sa lé vréman dézèspèran, kissoi la kouvèrtir bande zinportassion par zésportassion — kék santène milyon i sorte, plizyèr milyar i rante é biensir i apèl sa in balans ékstèryèr dézékilibré. Mi anparl ar pa lé zot shif pars zot i pé si zot i vé trouv sa dann nout zoinal, sansa dann zot téléfone si zot i vé bien alé rodé.

Alor mézami anparl bande post travaye dakor, mé toultan ké néna poin in vré dévlopman toute lo bande voiyan la pa pou vèrdi koméla. Si zot i arzoute èk sa bande zinégalité plizanpli kriyan. Arzoute ankor lo poursantaz pov é mèm mizèr, in zanfan dsu 2 i viv dann in famiye pov. zot i pé konprande lo maldévlopman noute péi.

Alor mi domande épi mi ardomande : kossa i (sansa ni) atande pou dévlope péi-la ?

A bon ékoutèr, salu.

Justin