Mi koné pa si zot la rogard bann match la Koup Lafrik : fransh vérité, in bann zoli match foutbal. Lé normal, vik in gran kantité bann zouèr lé dann bann gran-gran lékip. Napoin bonpé i zoué dann bann péi Lafrik. Pou mon par, mi kritik pa, akoz mi pans v’ariv lo zour oussa bann zafrikin va trouv shé zot assé lékip pou zot fé oir z’ot kapasité, é pétète d’ot nassion va sèy nir zoué la-ba.

Soman, kan i oi bann gayar éstad banna nana, avèk in gran kapasité épi solman in pti trépé dmoun la-dan, sa i fé in n’afèr. Akoz wi di, si moin lavé été marmay dann péi-la, épi si moin té koné bann moun i fé rèv amoin l’apré zoué footbal épi mi oi pa zot. Dann mon tète marmay, moin noré kalkil si na poin pèrsone pou rouv baro, détaké, pou lèss bann zèn rantré. In poussé épi nout tout i rant ansanm ! Épi nout tout i kriy in kou, nout tout ansanm.

Mé pétète, déor, nana la polis pou anpèsh bann réskiyèr rantré. Talèr, mèm bann marmay lé riskab gingn lo kou nèrf bèf, matrak, épi lo rèst. Alor, mi pans in péi oussa bann marmay lé intèrdi alé oir foutbal, sa la pa in péi pou moin, sa la pa in démokrasi galman, sa in lémitassion. Pa pliss !

 Justin