In pèp i fé pa an in zour, sirtou konm sète La Rénion la pass son tan a défé, a rofé, a défé ankor, épi rofé sépa konbien foi. Demoun l’arivé par kantité konm lam la mèr, la zète in pé z’ot kiltir, la pran in pé sak la trouv issi, la dépoz in pé : tout sort kalité dmoun, dopi 1660 par-la, ziska koméla épi la pankor fini.

Sa sé nout déstin, nout zéni, nout kiltir : nout tout zanfan zémigré, nout tout zanfan zétranzé, nout tout la mèl-mélé. Lé bien vré ! Mé solman, pou in moun i sort arivé, lé bien difisil konprann, pa dann son tèt, mé dann son “chair”, nout santiman a nou. Sak lé in pé intélizan, i konpran i fo lo tan, l’éfor, frote in pé avèk demoun landroi. D’ot I kroi zot i koné demoun La Rénion mié k’ni koné anou par nou mèm.

Tousa pou dir nana in préfé, la pass in koup dé tan La Rénion, dann son zèn tan, épi moin na konm lidé li kroi li koné anou, mié k’nou. Amoins ké li pran anou pou manzèr patat avèk la po : mi kroi pa kant mèm ! Alors siouplé, méssié lo préfé, in pti pé la modésti épi pti lanp-pti lanp wa konprann in pti guine-guine lo pèp La Rénion, firamézir.

Justin