Akoz François Coupou lé mor ?
Akoz bann nèrvis ofisièl, kolonialis, garoté dann drapo la répiblik la trouv in moun pou tap déssi. Akoz la-ba la préféktir gouvèrnman lavé mèt in lékip voiyou pou tinn parti kominis, in sèl pti lanp pétrol dann la nuit kolonial, in sèl pti limièr léspoir pou in pèp. Té falé in moun té i pèy pou donn lé z’ot la krintiv. Ala pou kosa moun-la lé mor.

Lavé donn signal pou tir inn apré l’ot tout mèr, tout konséyé zénéral, dépité parti kominis. Bann voiyou la pran pouvoir La Rénion. In préfé, la mèt éspré pou fé sal travay-la, téi fé diskour si "la chère et douce france". Shak foi té i di sa, lété, pou nou, konm in koud’kouto dann kèr.

Aprésa la mèt kinzène shomaz, la mèt larzan karné, la fé rmi, étsétéri, étsétéra...Solman, dann sinkant an, in mo d’éskiz la pa gingn le tan pou anvoy la famy François Coupou. La pa gingn le tan adrès in mo d’éskiz bann viktime la répréssion.

Pardon, éskiz ! Si mi di azot sa, mé in pèp la pa in tib dizéstif ! Fransh vérité !

Justin