Sominn dernyé, pou lokasyion zourné internasyonal lang maternél, épi ék lo konkour langkréol, zournal ék télé la mèt innti ginn an lér nout kozé, nout lang isi, nout lang rényoné. Myé vo innti ginn ké pa ditou, mé banna na ankor zéfor pou fé. Mé kamarad, minm innti ginn, i fo pa kroir sa la sort tousél konmsa, sou pat soval. Sa, sé lo rézilta in lon konba dopi swasantan o mwin. An parmi tout sak la sobat, la mét ansanm, néna an promyé, lo PCR ék Témoignages. Bli pa sa personn.

Bonpé an parmi nou, i an souvyin koman, dann tan avan, nout kozé té interdi lékol, é dann radio Dobré té ferm lo také. Nout lang té maltrété, téi pran ali pou shifon d’pyé. Lo pouvoir kolonyalis lavé gingn ziska anpwazone lo servo in bann, lavé mèt dann zot koko, nout kozé-la, té la ont, lo zoli kozé dans la bous té lo fransé, lang déor. Bon pé la gobé, si télman navé d’moun kan té ki sot la mér dé zour, ou té ki sort servis larmé, té koné pi koz kréol , kan té artourn isi ! Té falé antann a zot kass zot fransé mal fagoté, konm si zot lavé ont zot nasyion. Té ki fé pityé ziska. Mé mon dyé sénir, té pa zot lotèr.

Dobré ék son lantouraz lavé vouli étouf nout lang akoz dapré li, sa lété in lésafodaz, in linstrimanlizasyion kominis ék Paul Vergès, dann in perspéktiv lindépandans la Rényon ! La falu sobat’ lontan, pou gingn démaye tousa moulal kolonyalis té fine antasé, é tipé-tipé dégaz lo somin. Mé i fo pa kroir lo konba la fini. Minm zordi, néna ankor, bonpé Rényoné, la ont mét an avan zot nasyion kréol. Lo sékél lé ankor la.

Lo konba la pa fini, akoz zadversèr nout lang i an mank pa. Fo pa kroir. Rapél a zot, na pwin si lontan k’sa, kan Zospin la mét an plas CAPES kréol, koman bouklyé la lévé isi. Sertin i ansouvyin galman koman, in séf-zournalis isi, lavé trèt bann zintéléktyél lékritir nout lang, de zasasin marmay lékol.
Tousa i armont a nou , ké néna ankor bon pé somin pou fé, ki fo pa osi, sirtou ni obli, kin pép, san son kiltir, san son lang kozé konm ékri, sétin nasyion san zam, é san zavnir.
Antouka, mi kroi kin bon konkour fonnkèr langkréol, konm sak lé an préparasyioon, lé bonpé pli zinportan pou nout pép, kin konkour pli gro manzèr d’boudin ou dori sofé, ou kantoné konm zot i vé.

Pol