Oté

In Pèp san mémwar sé t’in pèp san z’avnir

Pol / 18 mars 2019

JPEG - 43.6 ko

La mémwar, sé lo kapasité nout koko néna pou anrozis kékshoz, konserv dopi lontan nout véki, épisa gingn arkont ali aprè. Li minm soubasman nout lidantité , soubasman nout kiltir. Epi foutor, i fo in moun i koné son pasé , sa i éd a li pou rofléshi par raport son ropèr, épi pou tras son domin. Sak lé valab pou in moun tousél, lé ankor pli vré pou lo pép in péyi. Dayèr, néna in gayar proverb i di : “In pèp san mémwar, sé t’in pép san zavnir !”. Lé vré, ék lo tan, i ariv souvan défwa, nout néronn i fé défo, ni obli in pé d’zafèr. Sé pou sa, tanzaot, i fo rafréshi ali in pé. Sinonsa in tralé souvnir i shap, i foulkan nét.

Mé lo pli grav, kan sé pou in péyi, kan in gouvernman i désid vol pasé in pèp. Souvien azot in sèrtin l’épok nou lété dann in ka konmsa isi La Rényon. Bin wi, fo di lo vérité ! Pandan lontan lo Pouvwar an plas, la vouli transform anou an pép san Listwar, rotroman di, in pép san mémwar, in pép kouyon pa kapab réfléshi pou son péyi. Rézman lo PCR té la. Mé li la pèye lo pri for.

Zistéman, dopi 1959, lo PCR i fé parti d’Listwar la Rényon. Lé inposib koz la Rényon, san mèt ansanm lo PCR. In paz 60 zané sharzé avèk in bann zévénman i fo pa ni obli. Pou sa minm, lo Parti ék Témoignages la désid arfé viv dann koko inpé, dann koko bann militan, an promyé, inndé gran moman d’nout Listwar dopi 60 tan ék Paul Vergès, konm vandrodi dernyé, par koté Sintklodid. A lokazyon, in lomaz pou Eliard Laude, asasiné lo 15 mars 1959, in zour zéléksyon ousa Paul Vergès li minm té asomé a mor par CRS. In lomaz, minm tan pou tout lé zot martyr kominis. Mé nora dot, konmsa.

In léshanz avèk in lémotyon . Si tèman sa la fé rapél amwin, diskour Paul Vergès pou lo 8e kongré PCR, par koté Sintsizane, débi zilyé 2013. Paul Vergès lavé di, ék rézon : In militan i ignor lo pasé lo PCR, lé pa bon pou ète in bon kominis.

Pol