Mézami, mi panss i manke anou kékshoze. I manke kékshoze noute péi pou pran son résponsabilité épi pou fé avanss bande solissyon li la bézoin pou li trape son vré dévlopman… In pé i di avèk la réjyonalizassion épi avèk la déssantralizassion ni pé fère toute sak ni vé fé.

Mé ni oi bien ké non.

Donkalor ni pé dmandé si sé lo bande klé d’droi k’i manke, sansa si néna bande klé d’droi, mé i manke anou léspri pou antroprande noute prope dévlopman. In n’afèr ni romarke sé ké la plipar d’tan ni anparl lotonomi alimantèr, lotonomi énèrzétike, d’ote kalité lotonomi mé nou la père di lotonomi tou kour… Pé s’fère sé pars lotonomi alimantère, osinonsa énèrzétik é d’ote ankor sa sé dé zafère konkré, ni diré an déor d’la politik. Lotonomi tou kour an kontrère sé kékshoze li lé bien politik. Ni diré sé sak i pèrmète anou pou pran in déssizyon k’i sava dann sans lo zintéré noute péi.

Sé nou k’i shoiziré la fin épi ossi lo moiyin.

Si par égzanpe ni shoizi solman lo moiyin lo bande sèrvis l’éta zot i shoizi la fin pou nou. Zot ministère l’agrikiltire, épi zot bande sèrvis santral sé zot k’i shoizi pou nou. Si zot i shoizi pa pou nou, sé zot k’i shoizi lo bande kiltir k’i doizète sibvansyoné é pa na nou. A partir d’la sé konmsi noute bra lé amaré dann noute do… Dann toute domène nou néna in konpétans partazé, é zamé nou lé mète dopi A ziska Z é sé sa k’i doneré anou léspoir ni gingn fé kékshoze par nou même, san pour san. Ni voudré in lotosifizanss alimantère i fodré nou lé mètr dann projé-la. Mé nou lé pa mètr, nou lé mètr par boute. Donk nou lé pa mètre ditou pars néna touzour in ministère, in sèrviss santral, in lérope pou anbare anou shomin.

Alon majine in loto épi plizyèr shofèr : inn pou la dirékssyon, inn pou l’alimaz, in n’ote pou lo frénaze, in n’ote ankor pou lo rofroisdissman. Donk néna pwin d’shofèr dossi é alon pa étone anou si lo loto i marsh kahin-kaha émème si i kalbite dann ba koté… Alor mézami, mwin lé pa konte lotosifizanss alimantère – mèm pour –, pa konte lotonomi énèrzétik – même pour –, pa konte lindistriyalizassion, pa konte toute bande mézir konkré néna dann noute programme, mé néna in n’afèr nou la bézoin sé la komande politik pars sé èl k’i pé fé ké lé zote komande konkré i vien a bou fé zot shomin konm k’i fo.

Néna la tète épi néna lé manbre : san la tète lé manbre i fonksyone pa an tan é an ère, i fonksyone pa konm i fodré.

Justin