Zot la bien lir bann bèl-bèl zournal la droit sé tan-si ? Kisoi Zournal dé lisle, kisoi Lo Quotidien. Sé pa si zot la armark in n’afèr ? Hin lé ga ! la kanpagn zéléksion la arkomansé san an avoir fini. Lé vré, zot nana in pé dépitasion : zot té i sar rouv la boush pou di “lo lion lé mor !”, ala lo lion i mor pou vréman mé sé lo lion Sintandré. Ala zot té apré aranz z’ot boush pou dir parti kominis la kalbité, ala k’li bouz ankor ! Oté ! La shiass na gro vantr oui ! In sinp zéléksion, dann konsèy zénéral, méssié Lagourgue manzé lé kui pou li, alak son fourshète i tonm atèr !

Koman i fé dann in ka konmsa ? Kèl parad i pé trouvé ? Nana rienk bann vié romède sé romède mirak ! Atak lo séparatism ? Non, sa la pa bon pou lo moman, toute lo dan la fine tonbé, épi ala la droit i pran sa pou li. Mèm son gouvèrnman li lé paré pou fash avèk... Arkri in kou : “Koup pa nou !” lé pa vré, mé l’moun i pé kroir in n’afèr konmsa ? Non, sa i marsh ar pa sa ! Alor, alon di “l’assemblée unique” sa t’in afèr la marshé dann son tan, épi la rotourn la majorité. Parti kominis té atèr mèm, sof lané 1983, li la arlèv an guèp.
Dann débara la droit-la, la poin inn dé zafèr i pé an sèrvir ? Inn dé vié zargiman i pass pi, lé riskab passé kant mèm. Zot i rèv ar fé rolèv lo mor !

Justin