Mé gouvèrnman néna in réponss é réponss-la sé fèr konm la fé pou la katédral Paris san tir larzan dann la kèss La franss mé an domandan bann milyardèr franssé larzan pou rofé Mayotte avèk in stratéji i apèl gagnan-gagnan é k’i profite bann moune rish mé pa tro bann finanss lo péi.

Lo minis loutre mèr, in sèrtin méssyé Vals bien abityé avèk larzan, la done la klé lo sistèm é li la di l’éta va kontourn toute lo bann règloman possib pou gingn fèr la vitèss épi rofé lo péi — pa konm li lété mé an pli nèv, an pli solide pou siporte toute kalité siklone, tyranbléman d’tèr é toute bann katakliss mé pou ariv rokonstruir lo péi.

Pèrsonèlman mwin néna in gran doute la dsi é mèm mwin la fine ékri in modékri pou dir La franss lé pa La chine. Si La chine i gingn fé an kinz zour in gran lopital pou vanj konte lo kovid an dur siouplé, i fo pliss kinz zour pou La franss fé in lopital an toil é lo dur, sirman li l’apré atann.

Antanssion bann maoré i suiv lafèr konm i suiv dolé dsi l’fé é zot la fine dir in n’afèr éfikass solon zot. Zot la pa bézoin bann lantropriz La Rényon pou ède la rokonstrikssion pars zot i fé pa konfyanss — mé zot i fé konfyanss bann lantropriz La franss é sirtou lo bann métod stil notre Dame de Paris.

Mézami, mi arète tèrla pars noré tro pou dir. Astèr mi invite azot porte atanssion so lésploi lo gouvèrnman franssé i vé fé — anfin li promète de fèr. Mé di azot bien la promèss lé bon pou sak i kroi, pa pou sak i fé.

A bon antandèr, salu !

Justin