Oté

In plan pou sorte dann konfineman ! Kanssa inn pou nou issi La Rényon ?

Justin / 3 mé 2021

JPEG - 43.6 ko

Mézami, mwin lé sirésèrtin, la pa pars wi koné pa kèk shoz ké li égziss pa. Sèl riskab ou néna sé d’anfonss in porte ouvèrte. Mi vé pa z’ète konm déssèrtin i réklame si é réklame sa, i krétike si i krétike sa, alé oir zote lé o kouran d’riyin. Sé pou sa,mi di, si par azar l’avé poi in plan d’sorti d’la kriz sanitère- mi diré plito lo dé kraiz sanitère-noré té ziska bien k’i prépare inn.

Mi anparl pa pou La franss mwin-la, mi parl pou La Rényon donk sanm pou mwin i fodré in plan pou nou ansorte anou kan lo dé kriz sanitère sar fini lag nout kolé. Pou koué kan sar fini, parss d’apré mwin toultan ké nou lé shanboulé konmsa mi antrovoi pa kossa néna pou fère.. Donk mi yèmré in plan k’i marke oussa ni lé, é i indike oussa ni vé alé. Mi di in n’afèr konmsa i égziss pa issi.

Dabor kissa néna la kapassité pou fé in plan konmsa ? Issi La Rényon kssa néna la kapassité é bann moiyin in lo i doneré ali. Mwin lé sir toulmoun i diré lé irzan fé si, fé si, fé la mé sa la pa in plan.Dann tan Paul Vergès, camille sudre l’avé in plan dévlopman réjyonal mé astèr frans vérité mi kroi pa néna.

Mi vé pa anparl pou arfé sak l’avé avan, pars zot i kopran bien sa sé in n’afèr k’i tienbo pa d’boute. Pou koué, sinploman pars i ranplass pa la frazilité par la frazilité. Si lo kriz la si tèlman fé mal anou, sé pars, nou lté déza frazil é sirtou noute lékonomi d’prodiksyon lété déza an lanbo.

Alor, d’apré mwin, toute sak néna konm matyère griz issi La Rényon i fodré zot i mète ansanm pou di : dann promyé kolone kossa néna é dan kèl éta i lé, dann in dézyème kolone kèl tèks i pé pèrmète anou fé sosi ou bien fé sola, épi lo poinn d’arivé an kalité épi an kantité dann sinkan, dizan, kinzan, vintan. Sansa étone pa zot si la kriz la mète anou aznou, é ké lo proshin kriz i mète anou koushé. An atandan d’ète mor é antéré.