Mésyé, Médam, La sosyété, koz èk moin sé koz èk in kouyon mé sé o pyé d’lo mir k’i oi lo bon mason. Alon kontinyé nout bate karé dann l’afrik an pasan so kou isi par lo Burkina-Fasso.-ansien koloni fransèz téi apèl La Haute Volta. Avèk plis présizyon, dizon provèrb-la sa in provèrb mossi, in pèp dé milyonn moun i rèss dann la boukl lo flèv Niger : in pé lé dann Gana, in pé dann Burkina, d’ot ankor dann d’ot péi l’Afrik dé l’ouèst.. Astèr lo provèrb nou la mark an-o la, kosa li vé dir ? Li vé dir sak ni pé lir an-o la, mé li vé dir galman si ou i gingn pa anpèsh in n’afèr pou arivé, ébin ou i lèss ali arivé. I sava pa kont lo déstin. Alé ! Mi kite azot rofléshi la dsi é ni artrouv pli d’van. Sipétadyé.