Koméla, i antann dann radyo, dann manifèstasyon, dann konvèrsasyon bann moun anparl "bann politik", é pa an byin siouplé ! Na mèm in pé i parl "bann politk èk bann patron", k’i ésploit demoun byinsir !
Lé fasil dir ; lé fasil an avoir lo konsantman d’ moun, kan ou i fé, dizon, konm in sort démagozi. Pou moin, dann z’ot kozman gran-guèl, zot i rofiz koz klèr, koz vré. Zot i vé pilto k’i fé anmay léspri Kréol.

Pou kossa, mi di sa ? Pou dé rézon. Promyé rézon, lé vré k’inn-dé z’élu la pa réspèk z’ot fonksyon konm ki fo, zot la déréspèkt ali.
Dézyinm rézon, sé k’i fo pa mèt tout demoun dann mèm panyé, pars sak moin lé sir sé k’in bon pé i travay séryézman shakenn solon son z’idé, mé onètman kant mèm.
La-dan, i fo fé lo tri : dann miyé, lé vré nana inn-dé grin zamal, mé la mazorité sé miyé mèm ! Na grinn bébé dann panyé mayi, mé la mazorité sé mayi mèm !

Mé sirtou, mi sort viv troi zour rant mon bann kamarad parti kominis. Moin la koz avèk in bon pé — tout té pa possib ! — vik navé d’koi. Épi sak zot la di i amontr sé bann moun onète, sé bann moun nana La Rényon dann kèr, épi i vé vréman fé in n’afèr pou nout péi é pou nout pèp rényoné.
Moin la ékout galman bann dirijan é moin la trouv zot i mérit la konfyans demoun. Moin la vi sé pa in bann dantèl, pa in bann paradèr mé in bann moun vré.

Alors, éskiz amoin, si mi vé pa irl avèk bann lou, pars manyèr bann kominis fé la politik, sa sé in bon manyèr solon moin ! In politik konmsa, oui !

Justin