Mi rapèl i rényon néna in somenn par-la é mwin la antann déssèrtin apré dir : nou néna in konsèye réjyonal dan la min bann politik rényoné. Nou néna in konsèye départmantal li ossi dan la min bann politik rényoné. Nou néna 24 mèr. Donk nou néna lo pouvoir donk la possibilité sèrv la koz rényonèz.

Donk si ni fé pa, sa i vé dir ni vé pa fèr, é si ni vé pa fèr sé ké ni rogarde arienk noute posh pou ranpli ali si tan telman noute prinssipal soussi lé pa défann la koz rényonèz.

Kossa zot i panss kan zot i antan bann kozman konmsa ?

Zot i panss vréman nou rényoné avèk lé pouvoir nou néna, ni pé bien sèrv lo zintéré noute péi épi nout pèp sansa i manke kékshoz inportan i done pan ou lo moiyin pou in lintervanssion éfikass dann sanss noute lintéré. I fo pa ni obliye na poin in rényoné prézidan la répiblik, ni shèf gouvèrnman. An pliské sa lérop lé pa dann noute min.

Mi oi ni pé si ni vé amontr nou lé an kolèr par égzanp kan lintéré noute prodikssion kann é noute bann plantèr kann lé pa bien okipé konmkifo. Ni pé kriyé ! avèk traktèr ni pé boush la route. Ok ! mé ni pé pa fors lérop épi lo gouvèrnman dann Pari, konm lizinyé bien pran an konte lintéré noute bann plantèr kann.

Sak mi vé dir sé ké partou oussa ni lé, nou néna déssèryin pouvoir, mé in pouvoir partagé avèk d’ote é k’i fé ké noute pouvoir lé pa réèl pou vréman.

Mi arète landroi mwinl’arivé, mésé pou dir azot réfléshi bien dann bann déssizion inportan nou na poin lo pouvoir pouvréman é ni voudré défann la koz rényonèz dann bann zinstanss ké ni pouré pa pou vréman.

Pars konm mwin la fine dir ; in pouvoir kassé par boute, lé pa inpouvoir pou vréman. A bon antandèr salu !

Justin