- Mézami, lo bézoin alimantèr in popilassion prèss nèfsanmil abitan, sa i mérite bien in projé ni pé apèl sa lo « kou d’min » pou lite kont la povreté é mwin lé sirésèrtin sa sé kékshoz éfikass. I paré in zardin ouvriyé dan La Franss sa i raporte bann zardinyé plizyèr santène l’éro shak ané donk néna de koi apèz in pé la mizèr.

- Mé sa i arète pa la, kansréti par son kontribission pou lotonomi alimantèr tèlman inportan si ni vé in méyèr métriz noute dépanss alimantèr dann sanss in méyèr lékilib noute rapor « inportassion-ésportassion ». Vi avèk lo zyé rényoné sa la pa insignifyan ditou… Ni pé galman anparl noute bézoin alimantèr dann noute prokssimité é la ni anparl la kantité mé ossi la kalité noute prodikssion alimantèr — kékshoz va konte plizanpliss pou nou konm pou toute demoune… pou toulmoune an final de konte dann l’avnir.

- Ni pé dir ankor an parlan lotonomi alimantèr, parl in bon rézo bann pti zardin — sé parl bann frui, bann léguime, bann rassine, épi bann matèryo toute kalité — avèk zot konsèrvassion, zot transformassion, zot kréassion bann rishèss… sé anparl ossi la roshèrch, l’anploi, é lo pa an avan possib dann sanss in méyèr dévlopman pou noute péi épi son popilassion… Astèr si ni mète ankor ladan la prodikssion tizane-ni produi 700 kalité tizane issi la Rényon é bann tizane-la avèk zot transformassion épi zot améliorassion sa i done anou in méyèr santé — in manyèr rann médikaman doktèr pli éfikass ké zot i lé ankor zordi-antouléka sé sak bann tizanyé i di zot mèm… !

Mwin la pankor fini : Mi arète tèrla zordi mé domin mardi nou va prézante in gran projé la sékssyon Sin-Dni noute parti kominiss. Si toute i done la min, mi panss nou v’a gingn alé loin.

A bon antandèr, salu !

NB in kozman mwin la fé dovan lassanblé zénéral Parti kominiss dann Sin-Dni

Justin