Donk zot i koné pou kossa i di zordi »La Répiblik Maurice » é pou kossa lo péi néna in Prézidan La Répiblik-zordi sé méssyé Dharan Gokhool - mèm in vice-prézidan La Répiblik.i apèl Robert hungley.Mi koné pa tro kèl sé zot pouvoir mé mi koné noute bann voizin i konsidèr bann mmoune-la épi lo linstitissyon zot i roprézante konm demoune in portan pou La Répiblik.

O fète, pou kossa mi anparl azot sa ? Pou inn bone rézonsé ké néna inn-dé zour mwin la antann dann télé Maurice in diskour lo Prézidan la fé pou souète lo pèp Maurice in bone ané 2025 konm in pé partou , dann bann gran konm dann bann pti péi lo Prézidan sansa dé foi lo proimyé miniss i souète o pèp in bone ané.Eskiz amwin si mi anparl sa avèk fyèrté pars nou néna in pèp frèr é pèp-la néna son Prézidan.

In n’afèr mi rogrète sé ké na pwin pèrsone issi La Rényon pou roprézante nout pèp rényoné dann bann gran protokol konmsa... Sa i fé si tèma lontan mi éspèr oir sa i, zour shé nou.Mé kissa k’i koné : pétète in zour pti pa pti pa v’arivé.

Alon kontinyé anparl in pé lo Prézidan nout voizine.Bon ! zot i koné sé in péi kréol konm nou ossi é dopi plizyèr zané lo kréol morissien donk lo morissien néna in bon plass dann la vi piblik é dann la MBC néna in zoinal parlé an kréol alé oir nou na pwin é lé bien domaz. Donk lo Prézidan la prononss son vé an morisien é mi pé dir azot sa téi fé sèryé par rapor sak li la di,par rapor koman li la di é la fasson li la anparl bann problèm nout voizine néna é loryantassion li vé lo péi i pran pou trouv in solission.

Biensir la Répiblik Maurice néna in gouvèrnman é sé lo gpuvèrnman ki amenn la politik gouvèrnmantal dann lo péi épi dan la Répiblik… sèl rogré sé ké lo Prézidan i vien pa anvizite ofissyèl shé nou pou nou myé konète ali émyé konprann lo pèp morissien.

A bon antandèr salu !