Vantyèr o soir, moin la antann François Hollande dann télé. Mi pans zot i koné kisa i lé ? Touléka, dan lo tan k’i vien, lé sir sa in n’om nou va antann plizanplis. Mi rapèl kant mèm, pou sak nana mémoir lyèv, kan la fé sak i apèl bann Primèr la gosh, nout parti la invit anou alé vot pou li. Mi pans, in pé pou sa mèm boug-la la gingn la majorité La Rényon dovan Martine Aubry. Li la gingn la majorité dan la Frans épi dann l’Outre-mèr, donkalor sé li lo kandida parti sosyalis épi d’ot mouvman la gosh.
Mé ala pou kosa mi parl azot de sa : vantyèr donk, li t’apré anparl l’édikasyon nasyonal pars sa in n’afèr lé inportan pou la zénès, pou lo péi, pou prépar in bon l’avnir pou la Frans. Pou La Rényon épi bann l’Outre-mer, sa sé in késtyon inportan galman. Zot i koné koman l’ilétrism i fé déga dann nout bann péi. Zot i koné osi, in péi, pou li bien dévlopé, i fo li nana d’moun bien formé. Donk, François Hollande i di é i rodi, li lé kont bann kontro-réform gouvèrnman la droit.
Dan l’édikasyon nasyonal, lo kandida Hollande i rodi li va anbosh soisant-mil nouvo travayèr dan l’ansègnman. Pou kosa, pars li kroi pa di tou in sistèm l’édikasyon avèk moin l’anségnan. L’èr-la li la fé in kasaz lé kui, demoun la bien aprésyé ; li la di : li kroi pa in l’ansègnman san amontrèr, in médsine san médsin, épi li azout, pétèt in zour désèrtin va pans in prézidans san prézidan.
San prézidan Sarkozy, sèt-la moin lé sir, é mi pans mèm, sé in n’afèr k’i fo anou… é mi trouv mèm i tard.

Justin