Mézami mwin néna in bone avèk in mové nouvèl pou anonss azot. Alé ! mi komanss par la bone : sète ané la fé in pri l’élokanss é lo diskour lété fé an kréol rényoné. Ala in bon zafèr pou vréman ! Ala la prèv konm de koi noute lang kréol lé konssidéré. La jène fiye la gingn pri-la i frékante in lissé sint-Pol é tanmyé pou èl.

Mé dizon sa la pa ariv konmsa. Sé son travaye épi son talan l’amenn aèl la, apré troi zané èl la pass a étidyé la lang kréol rényoné dann son lissé Sin-Pol. Bravo aèl ! Bravo épi konton dsu bande jenn pou ète plizanpli nonbré pou prézante azot l’éprèv-la.

Bravo pars sé la prèv noute kréol rényoné i komanss a ète konsidéré konm kékshoz lé inportan. Néna lontan déssèrtin rante nou i koné sa mé i fo kroir in pé téi gnor sète afèr-la vi k’i fé in gran ka avèk l’éprèv l’élokanss dann noute lang anprété , lo franssé ..Mé i gnor kaziman, noute lang nou la fé, lo kréol rényoné .A partir d’mintnan lé shoz la shanjé ?Kroi touzour mé fyé pa tro.

Pou kossa mi di sa ? Pars bande marmaye lissé i sorte komanss pass lo bak é an parmi bande zéprèv la lang néna la lang LV 2. Sète-la wi pass ali é wi gingn solman lo bande poin i dépass lo dis : si wi gingn 13, i paré wi gingn 3 poin an pliss pou mète sa dsi oute total -i pé ète inportan inn-dé poin anpliss pou goumante lo total.

Zistoman in pa an avan bande marmaye i pé pass lo l’éprèv LV 2 an kréol rényoné ;avèk in bone préparassion sa i pé mète di bèr dsi lo zépinar. Sof si wi shoizi l’éprèv kréol rényoné é l’administrassion i tronp konplèteman é i mète aou a pass l’éprèv an l’éspagnol sansa an zalman.

Mézami figuir azote sé sak la spass pou la dézyèm ané d’suite dann in lissé Sin-Pol é la jenn fiye mwin la anparl azot, la gingn lo pri l’élokanss an kréol, ébin l’administrassion lo bak la tronpé é la marke aèl an LV2 in lan g éropéène é pa dann kréol-sak èl l’avé shoizi. D’apré sak mi kroi, inpossib rotourn an aryèr.. érèr sansa vilin manyèr ? in pé i pansh pou dir sa in vilin manyèr.

Ni konte dsu la réktriss in zamiz noute lang d’apré sak i di pou réktifyé lé shoz.

A bon antandèr, salu.