Mi ékri azot dimansh soir ; dzann in néstan va zoué in match fotbal la koup mondyal bann madam Brésil kont la frans. Kisa va gagné ? Mi koné papou la bone rézon mi grata r pa ti-boi . Tout fasson rant lé dé nora in gagnan épi in pèrdan : sa sé laloi fotbal . Mé sa i fé pans amoin in n’afèr. In n’afèr grav pou la zistis é pou l démokrasi dann in gran péi i apèl Brésil.

Dann péi-la zordi néna in prizonyé sélèb. Mi diré mèm sé in prizonyé politik i apèl Lula, in l’ansien prézidan La Répiblik.zot i rapèl de li, pars bononm-la lé konsidéré konm lo méyèr prézidan lo péi la mète anlèr dopi lontan. An touléka, li lé tèlman popilèr bann zéléktèr Brézil téi sar mète ali ankor prézidan pou in tour .

In droite à tou-fèr la maye ali avèk in prosé la sosyété Petrobras. La di li la gingn po d’vin.la di avèk po d’vin li l’ashté in gran vila é mèm myé k’sa, lo propriyétèr avèk lo lansien prézidan la fé in trikmardaz si tèlman i di li lé okipan san tit. Zordi tout bann ziris Brésil épi bann ziris internasyonal i koné sa la pa vré.I koné sa sé in manipilasyon in ziz i apèl Moro la fé pou anpèsh Lula port ali zéléksyon.

Zordi bann dépité i fé arienk protésté pou k’i libèr lo lansien prézidan, pou k’i rokomans son prosé épi i rokoné li lé koupab pou arien. Tanka lo ziz Moro-lé minis la zistis li koméla-, i rosanm bien son bann zour lé konté . Tanka lo prézidan fasis, Bolsonaro, ébin li va pèrd son préstij pars konm i di lo zé lété triké. Alor si asoir Brézil i gingn, sansa si Brésil i pèrd i tard pa demoun par milyon i sa dsann dann bann vil lo péi pou k’i rétabli la démokrasi.

NB. Nitil dir azot lo prézidan koméla Jaïr Bolsonaro i tonm kopin konm koshon avèk Donald Trump. Li lé mèm aligné dsu léstrévagé zétazini ‘Amérik. Nitil dir azot ankor li lété in partizan la diktatir militèr néna kék z’ané.