Mi antann i di souvan si in problèm néna solission la pa bézwin kass son tète, i sifi aplik la solission é si li na pwin solission ébin i fo pa kass son tète galman pars sé pèrde son tan..

Fassil a dir ! Pars kan kékshoz l’apré tourn dann out tète san arété, ébin wi vé wi vé pa sa i trakass aou ; in n’ot afèr konpliké sé Lo pli konpliké sé kan néna plizyèr solission possib pars koman wi fé pou trouv lo bon solission.

Mwin néna in kamarad i di amwin konmsa, ki di problèm é mwin lé pa la èk sa é si li lé pa konpliké li va trouv li mèm son solission. Donk mi kass pa mon tète avèk li é si li na pwin solission kossa zot i vé mi fé ? arien bien antandi..

Mi koné pa kossa zot i anpanss mé si zot i rofléshi pétète zot va trouvé é ni artrouv domin sipétadyé.

Justin