Matante Zélida la ékrir Justin :
Mon shèr nové, vi koné koman mi èm nout ti-prézidan. Vi koné ? Sirtou pou son manièr d’kozé. Vi konpran tout suit sa in moun i pans lé z’ot, pou fèr d’bien lé z’ot : i sort pa goumant larzan vié moun. Oui, mon nové, 8 pou san, ankor, d’apré sak demoun i di. Alor, di in pé out léspès shifon rouz tourn sète foi son lang dann son boush avann kozé, sansa son plime dann lankriyé. Tan k’aou, ou va rès malfondé : malfondé in zour, malfondé touzour !

Justin la réponn aèl :
Matante, « rozoir vid i fé bon pé dézord ». Si ou lété pa in vié moun, nana lontan moin noré fine larg aou inn-dé kozman pou boush out také. Alor, 0,8 pou san, dann out boush, la fine ariv 8 pou san ; For, for, for ! Matante, avèk lo pti goumantasion v’ariv moi d’séktanm, i trap ar mèm pa lo pri la vi i koute an plis... Épi, obli pa sak out ti lidol la promète : goumant 25 pou san bann ti rotrète dann in périod sink’an. Lé vré, dann in kours, torti la bate lièv - ti dousman, mé sirman ! Si i kontinié konmsa, bann ti rotrété va fé ankor pli pitié ké zordi - aou an parmi ! Z’ot posh sar plate, plate, arshi plate !
Alé, mon vié matante, nou va artrouvé, solman lèss amoin di aou in pti provèrb bann politikèr i koné bien : « In promèss, sa i angaz sak i kroi... pa sak i fé ». Fransh vérité !

Justin