Lé vré déssèrtin la di sa la pa pli kolossal ké rofé la katédral Pari é poitan laba la vnyabou rofé katédral la. Lé vré la mète sinkan, la fé bann gro dépanss, la dépanss in gran kantité larzan mé o boudikonte lo rézilta lé la é sak néna la shanss alé laba dann kapital La franss, nora lo plézir oir gran katédral la « rofé a lidantik ».

Mé ni pé poz anou in késtyon sinp.Ni pé domann anou kèl kalité péi i sava rofé laba dann Mayotte.Mi panss pa i sava rofé Mayotte « a lidantik » pars mi kroi pa in péi konm La franss i pé kontante ali avèk in prozé konmsa é mi kroi pa bann maoré i pé zète kontan avèk sa, konm bannzil Komor zot ossi kontante azot avèk in n’afèr konmsa… Parl pi bann zoizo d-passaz, sak lé pa la pou Mayotte mé pou zot posh.

Si zot i pérmète amwin fèr in romarke. Mi konstate gouvèrnman bannzil komor –antouléka son Prézidan-la pa mète lontan pou réazir é la désside in dèye nassyonal dsi in somen.Prézidan la franss la désside in dèye d’inn ptite zourné, lo tan mète bann drapo an bèrne épi romète azot konm k’i fo… Aprésa Lo Prézidan la pa gingn tienbo son lang épi la déklar si lété pa La franss zot noré té dismil foi pliss dan la mèrde ké zot i lé.

Sa ni koné pa pars pou ète dan la m—bann maoré épi bann moune lé laba lé bien d’dan. Avèk in préfé k’i koné pa tro konté k’i anonss plizyèr santène mor, mèm plizyèr milyé, alé oir sa lé loin d’ète la réalité. Arzoute èk sa, konm dabitide in manke léfikassité konm dabitide si tèlman la sityassion i komanss par anpiré grav avan in solission dsi lo lon-tèrm i fé atann azot pli ki an fo.

A bon antandèr, salu !