Mézami, zot i koné noute parti (Lo PCR) la zamé été in parti an aryèr par raporte lé zot pou produi bande zidé dsi l’avnir noute péi. Mi souvien Gilbert Annette l’ansien mèr Sin-dni, kan Elie Hoareau la fé in konféranss a lokazion d’lanivèrsèr noute parti-soissantyèm aniversèr – kan li la di Parti kominiss sré lo parti lo pli rish si téi pèye ali pou toute son zidé dsi la Rényon.

Si ni di la Rényon, départman franssé, légalité sossyal, la kiltir rényonèze, lotosifizanss alimantère, lotonomi énèrzétik, lo tram-train, la route tamarin, la konpagni air-austral, lo prozé la konpagni bato, la lite konte bande bidonvil, la mcur, lindistriyalizassion la Rényon, si ni anparl lo kréol lékol épi la kiltir rényonèze, si ni parl la lite konte lo shanjman klimatik é in bonpé zafèr ankor, ni trouv la kékpar pate lo parti kominist rényoné épi sète Paul Vergès.

Donk si ni anparl in kantité zafère demoune lé dakor zordi La Rényon ni rande anou konte lo péi i doi sa bande zidé-la lo parti kominis rényoné. Biensir la pa nou k’la invante la réjyonalizassion. Mé dopi 1959 nou la propoze kékshoze original pou noute péi sé l’otonomi-pa in parol anlèr, mé kékshoze sèryé, rézoné, avèk in bande projé pou l’avnir noute péi.

Lé pa étonan ké gouvèrnman franssé étan maye-mayé dann bande difikilté l’outre-mèr i panss toudinkou lotonomi pou la Guadloupe mé an fézan konmsi noute parti i propoze pa arien pou La Rényon. Mi sa pa anparl sa lontan mé noute parti la kante mèm é pa dopi dé zour propoze in rényon toute bande forss viv noute péi pou diskite d’in projé rényoné par épi pou bande rényoné.