Moin néna famiy la parti dann l’afrik di sid pou pass in pti somenn vakans. Moin la pa parti so kou isi pars moin la pèr ète désu. Pou kosa ? Ozis mi koné pa, sansa néna d’moun i bte la lang dsi péi-la pou di avan l’avé si, l’avé la é koméla lé shoz la dégradé. D’apré zot pars boudikont mi oi ré pa lé shoz konm zot.

Mi souvien néna lontan-avan i fini avèk l’aparteid - moin la gingn lokazyon pass par laba dsi mon rotour la Rényon dann bato pars kanal Suez lété fèrmé apré la guèr dis zour, donk bato la kontourn lo kontinan afrikin. Sak mi rapèl ? Moin pèrsonèl avèk mon dé troi kamarad rényoné, pèrsone la pa di anou ni fé anou arien. Nou lété pa blan mé téi konsidèr anou konm blan mé bann zafrikin zot téi fé pityé pou vréman : lo kar pou blan lo kar pou koloré, shèz zardin pou blan shèz zardin pou koloré. Anfin l’aparteid dann sak li l’avé lo pli inimin.

Koméla, sa la fine pasé é bann moun noir la gingn promosyon. Bien bon mé sak moin lé sir sé k’i korij pa in sosyété vitman-vitman an dé tan troi mouvman. One man, one vote é Nelson Mandela la fini pass par la. Moin lé a d’mandé si la fé in réform agrèr laba : mi koné i doi féinn mé kan mi koné pa. Moin lé a d’mandé si d’moun i kontinyé pa iz z’ot kor dann bann mine dyaman pars moin la lir in-dé nouv èl l’aktyalité la dsi.

Bien sir, konm moin la di i shanj pa lé shoz vitman ko nmsa mé si i tard pou fèr mi domann amoin si apré sar ankor tan pou fé. Mi rapèl solman in kékshoz moin la antann na poin lontan ésa séin fyèrté pou moin an tan ké rényoné épi kominis. Kosa mi anparl la ? Mi anparl lo tan l’ANC la désid fé la lite armé é tout bann parti kominis plis d’ot ankor la désid done in kou d’min. Moin nora touzour dann montète sak Elie Hoarau la di : Paul la fé vni lo trézoryé lo parti é la dmann konbie larzan l’avé an kèss. Lo ga la réponn : tan ! Paul la di tir moityé sa sé pou bann kamarad afrikin.

Lo tan la passé, l’aparteid la disparu mé in sinp zafèr konmsa i réshof mon kèr-mon kèr d’kominis rényoné. In fami y la fé lo voyaz mi anparl an komansan la done amoin i n pti boutir lavande épi la di amoin : sa i sort dovan la kaz Winnie épi Nelson Mandela, mète ali dan la tèr an souétan li pous. In gran kado pou moin, in gran kado avèk bonpé la valèr ?