L’ané 1870, lo trèz zilyète, l’Almagn la bézoin lèv la guèr avèk la Frans, pou anshèv son l’inité. Mé pou fé la guèr, i fo in rézon, in bon konm in mové rézon... Bismarck, shèf gouvèrnman l’Almagn i pans an avoir trouv in l’okazyon, mé son lanpérèr i démine lo tik-tak.
Alors lo boug i pran in nouvèl, sa i apèl "in dépèsh" — la dépêche d’Ems —, li la falsifyé sa tèl fasson, la Frans i pran sa konm in boush-ta-guèl. Son gro-kèr i monte épi z’apré, la guèr i pète rant lé dé péi. Sé konm sa k’la spassé ! Aprésa, la Frans la gingn inn shof é l’Almagn la anshèv grandi ali konm li té i vé, pou anshèv son l’inité.

Par l’fète, nou noré poin issi ossi nout ti-Bismarck, nout Bismarck déyèr la kuizine ? Vi k’ inn la mète, moi d’zilyète mèm — solman zilyète 2009 ! — dann diskour méssyé Fillon in paragraf pou atak bann koléktivité lokal pars zot i antropran pa konm k’i fo.
Mé oussa Méssyé Fillon té i sava pronons diskour-la ? Déssi la route tamarin... fassonn dir Prézidan la Rézyon : « Pran sa pou toué ! ». Tèl fasson k’i mète in koin rant la rézyon épi lo gouvèrnman.
Lo prézidan, son gaz i monte, dispite i pète, épi l’afèr lé byin parti pou zéléksyon rézyonal. Sé pi in dépèsh "d’Ems", sé in morso diskour "la route tamarin" !!

Mank de po, Promyé minis la pa vouli gob so zèf kri-la, li la sote lo morso, é nout ti-Bismark déyèr-la-kuizine té blizé anval son shapo, …pou pa di son képi.
Soman, antrotan, méssyé Préfé la mète son troup an mouvman, son bann transportèr avèk son méssyé Manzin dovan Konsèy rézyonal-li, térin zilo-li, boudikont in pé partou, pou fé dézord, é pou fé monte la kolèr déssi Konsèy rézyonal, konm son papa éspirityèl, in sèrtin Perreau-Pradier té i mète an mouvman son bann nèrvis kont la parti kominis.

Alors, Bismarck, sansa Perreau-Pradier ? In pti kou d’Bismarck, sansa in gran doz Perreau-Pradier ?
Vou z’an roprandré byin in pti n’afèr ! Santé zot tout !

Justin