Donk néna déssèrtènn matyèr i fé dann Breton, d’ote dann la lang bande Franssé, d’ot ankor mi panss dann la lang bande zanglé ka i ariv dann klass katriyèm. Mé kan i pass brové toute kolézien i doi prézante mèm zéprèv donk i pé an avoir in traka pars dann rézo Diwan d’apré sak mwin la konpri i amontr syanss an Breton é dann Franssé dann lékol ofissyèl.

Bon nouvèl pou bande Diwan, sète ané bande marmaye troizyèm la gingn lo droi fé zot dovoir syanss dann la lang Breton é biensir lo droi zot dovoir pou ète korizé épi noté. Mi panss la tir azot épi zot paran épi zot proféssèr zépine dann pyé mé té la promyèr foi lo minist lédikassion nassyonal la done lotorizassion pou sa.

Pti pa, pti pa v’arivé.

Astèr mi sorte lir dann péi Bask la done lo mèm lotorizassion épi la fé konmsa é bande bask la shoizi zot mèm la lang zot la ansèrv pou fé zot dévoir dann déssèrtènn matyèr.-éspèron dan l’avnir va kontinyé fé konmsa laba épi akoz pa ayèr é zot i konpran oussa mi vé arivé avèk mon gro soulyé, mi vé ariv dsu lo poinnvizé noute kréol rényoné inn foi k’va nyabou fé in vré lékol biling issi la Rényon.

Mé pou ariv la, néna ankor in bonpé travaye pou bande militan pars zordi ankor sé in problèm militan plito k’in problèm institissyonèl é sé bande militan k’i doi fé avanss in bon solission pou done kréol son plass dann lékol, kolèz,inssi d’suite ziska l’inivèrssité kissoi an parmi lékol ofisyèl, kissoi dann in rézo « lang kréol ». Antouléka i fo bien in zour ni fini par ariv fé nou ossi in n’afèr konmsa.

A bon antandèr, salu.