Sa sé la vérité mèm ! Soi ou i mète la zèf a kouvé : l’èr-la ou i pé gingn in pti pipite. Soi, ou i kass lo zèf pou fé frite : l’èr-la ou i gingn in zèf frit é pa d’ti pipite. Sa, konm ni di sé lo sans prop mé si sé in provèrb li nana in n’ot sans é kèl sans li pé avoir ?

Moin pèrsonèl mi oi konm sans ké kékshoz i pé pa ansèrv dé z’afèr an mèm tan, si inn i dévir lo do avèk l’ote : soi sé inn, soi sél’ot. Dann kèl ka i pé ansèrv kozman-la ? In légzanp : soi ou i dépans out l’arzan pou out bézoin sansa out plézir, soi ou i ramas ali pou in prozé pli tar. Konomizé avèk dépansé : inn é l’ot i marsh pa ansanm.

Mi koné pa kosa zot i pans mé pou moin sa sé in n’afèr ni pé aport la prèv tou lé zour. Mé zot i fé sak zot i vé ou bien zot i pé avèk z’ot larzan. La pa mon traka é mi sava pa maye amoin la-dan.