Nana in kozman i di konm dé koi, in kouyon sé in moun danzéré. Poitan, lo boug mi mazine, dann mon tète la poin la répitasion ète in inbésil - dizon, mèm, li la pa tié kouyon pou pran son plas ! Solman, tazantan, son gaz i monte, alors li lé paré pou propoz ninport dé koi, san kalkil si sé in bon ou bien in mové désizion.
Mé pou an avoir bon blag, li na bon blag é li lé riskab fé prann aou blan pou noir, po d’shanm pou pla kouvèr, makaroni pou la bouzi. Oté ! Boug-la, la pa ninport de ki : li lé lo mèr son komine, li lé sénatèr, i prétan mèm in tan banna té i vé mète ali konm ministr dann gouvèrnman...
Ala k’lo boug la désid fé bèss lo pri médikaman : san kass son tète pou konète toute bann konsékans i pé an avoir pou lanploi, pou bann nouvo farmasien, pou lékonomi La Rénion étsétéra-étsétéra. Banna la mète an kolèr : alors, kossa lo boug i fé ?
Ala éstèr, i prétan, li lé dakor pou li vanz avèk bann farmasien. Gouvèrnman va antann ali, so foi issi. Arienk bann détayan i siport so bèss-la. Bann z’inportatèr, i toush pa don sa ? Oubli pa li la vote bann franshiz déssi médikaman. Sa i vo bien in pti rotour kant mèm !

Justin