Oté

« In pyé d’boi torte lé dir pou rodréssé »

In kozman pou la route

Justin / 27 mars 2021

JPEG - 43.6 ko

Médam zé méssyé, la sosyété koz èk mwin sé koz èk in kouyon mé sé o pyé d’lo mir k’i oi lo masson. Mézami, provèrb-la néna in bon pé d’moun i di sa La Rényon é mwin lé sir, malin konm zot i lé, zot la fine konprann lo sans ni pé done ali, kissoi lo sanss prop, konm lo sans figiré. San prop ? Normalman in pyé d’boi, sa i pouss droite, pars normalman li sava landroi solèye avèk la limyèr i atir ali é si li pouss tort sa i vé dir li la konète in laksidan : pé s’fèr in n’ot pyé d’boi la tonm dsi li, kissoi li l’avé poin la plass k’i fo pou li pik droite dann syèl kissoi in rosh la fé man kali son dépar droite. Sak lé vré kan li la pouss torte, é li lé fine in pé gro épi in pé gran, la poin moiyin drèss ali. Sans figuiré/ Pran légzanp dsi in jnn moun, li la pa gingn lédikasyon k’i fo é boudikonte li na pliss viss ké l’izine Bo-fon. Wi pé sèye mète ali droite mé konte pa tro dsi : torte li lé, torte li va résté. Mové li lé, mové li va rèssté. Alé ! Mi kite azot rofléshi la dsi é ni artrouv pli d’van. Sipétadyé.