Médam é Mésyé, La sosyété , koz èk moin sé koz èk in kouyon, mé sé o pyé d’lo mir k’i oi lo mason. Figir azot moin la trouv patoi-la dann in liv « zistoir Kristian » [1] dsi la finisyonn lo liv. Moin té a d’mandé-mi domann amoin ankor-kosa lotèr i vé di égzaktoman. L’èrla, moin la parti kont lo nonm bouton bragèt néna dann mon pantalon, sak néna ankor bouton. Moin la trouv kat é moin la di si i désid mète sink sé par prékosyon. Si sé sa, sa i vé dir lo moun Kristian téi viv an parmi lé san prékosyon, in bann moun i done pa zot la pène pran in liks initil, in sékirité la pa vréman nésésèr. A bien rogardé, pé s’fèr bann tayèr La Rényon téi mète sink bouton avèk bragète, pou ète pli solid, sansa pou évite bann zaksidan. Mi lèss azot rofléshi dsi sète afèr-la é ni artrouv pli d’van. Sipétadyé.