Médam, Mésyé, La Sosyété, koz èk moin sé koz èk in kouyon – mé sé o pyé d’lo mir k’i oi lo mason. Mé zami, isi La Rényon ni koné kosa i apèl in ravine i koul asèk ! Konbien foi nou la fine oir bann ravine avèk mèm pa in pti pisa d’lo dann son li. Néna défoi désèrtin ravine i port zot non-d’séshrèss konm par ébzanp « Bra sèk ! » , « Ravine sèsh » épi d’ot ankor. Néna poinn lo dodan mé antansyon ! Pou kosa mi di antansyon ? Pars si in gro plui l’arivé, si in siklone lé déklaré, lo ravine a sèk i mète a gonflé é fouti pou ou si ou i dégaz pa : li kass, li briz, li ranpli d’lo bor-an-bor mèm li sort son li épi li ravaz tout sak néna pou ravazé. So kou isi la pi in ravine k’i koul a sèk mé in ravine k’i koul a flo é la, la pi lo mèm zafèr ditou..L’èrla i fo port antansyon-antansyon pangar-pars sak i ariv la pa ordinèr ditou mé mi pans zot osi zot i koné sa Alé ! Mi kite azot rofléshi la dsi é ni artrouv pli d’van. Sipétadyé !