Matant Zélida la ékrir Justin :

Mon shèr nové, mon spès salté,
Si mi tronp pa, si La Répiblik sé l’égalité, tout son bann zanfan i doi zète trété lo mèm manyèr. L’èr-la, mi konpran pa pou kosa bann rouj-de-fon i domann in moratoir pou k’i anbosh bann Rényoné mèm si zot na poin lo mèm diplom ké lé zot kandida i sort déor. Donk, mi oi, dann sistèm i égzis koméla in bon manyèr pou asir l’égalité rant tout bann sitoiyin La Répiblik. Pars, sansa, sé in manyèr pistone sak lé né La Rényon. Boudikont, la fonksyon piblik zot i vé sé la répiblik piston. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
sak ou i di la, pa pou étone amoin ditou, pars lé normal pou ou in sistèm inzist sé in bon sistèm, é tan pir si nout jénès, sak lé diplomé lé anfonsé dann shomaz ziska lo kou. Si sa la pa in l’inzistis, mi èmré k’i ésplik amoin kosa i lé ! Tan k’a nou, mon vyé matant, ni rovandik in droi pou nout zénès pou mète ali o sèrvis nout pti péi La Rényon, son l’ékonomi, son l’administrasyon, son santé, son vi piblik. Pou sa, ni domann in moratoir pou donn lo tan nout bann zénès prann an min bann résponsabilité. Pou kosa ? Pars lé pa bon nout zénès diplomé lé bordé konmsa. Pou kosa ankor ? Pars l’Eta la pa fé isi tout sak i fo pou donn kréol travay dann l’ankadroman. Kèl rézon ankor ? L’ankadroman dann nout pti péi la pa sak li dovré ète dann son kalité, mèm an kantité. Arzout èk sa, i donn souvan dé foi in brové la konpétans pou sak i sort déor, mé lé pa sir ditou ké dann lo rézilta, sé sak ni rotrouv. Ala pou kosa, ni réklam i donn kréol travay dann l’ankadroman. Astèr, zot i doi prouvé zot kapasité, pa pou fé konm lé zot, mé pou fé myé ké lé zot. Konm l’AJFER i di : « Nou lé kapab ! ». Tok ! Pran sa pou ou !

 Justin