Oté

In révolt maté, sé in fé k’i kouv sou la sann é i domann arienk rodémaré !

Justin / 21 novanm 2018

JPEG - 43.6 ko

Matant Zélida la ékrir Justin :
Mon shèr nové, mon spèss salté, rouj-de-fon dovan l’étèrnité, mi pans astèr zot i doi zète kontann d’zot. A ! zot lé pou arien ladan ? Pou arien vréman ? Pétète zot la fine obliy lo kozman : sak i sème lo van i ramass la tanpète ! Sé kant mèm sa mèm zot i sort ramasé. Non ! Pou zot, bann rouj-de-fon arien lé pa bon : larzan la p’asé é sak néna néna tro ! Zinpo lé tro shèr é mèm pou sak i an pèye prèss pa ! Lékol lé an fayite ! Lozman i mank étsétéra, étsetéra la ké lo ra. Final de kont zot, bann rouj, zot lé in pé konm lo vèr dann frui. Lo frui si pa zordi, pa domin li pou gaté é sak lé bon dodan i anrèss trépé. Tok ! Pran sa pou toi !

Justin la fé pou répons :
Mon vyé matant k’i koz la boush rouvèr. Out kozman i arsanm aou mèm ! Pou kosa mi di sa ? Pars sanm pou moin ou i oi pa tro granshoz dsi sak i éspass isi La Rényon. Astèr mi rotourn aou out prop kozman : sak i sème lo van i ramass la tanpète.
Fransh vérité matant, ou i apèrsoi pa néna in gouvèrnman, i n prézidan é bann zélu la droite l’apré provok demoun isi La Rényon konm lé pa posib. Provok bann vyèye pèrsone ! Provok bann lokatèr ! Provok demoune i gingn trépé é i débate pou zoinn lé dé bout par l’milyé. Ou i oi pa néna insipèr provokatèr i apèl Didier Robert ranvèrsé dann son piramid.
Vi kroi vou, nou rényoné ni pé z’ète kontan oir bann kopin-kokin apré sèrv azot konmsa dsi l’kont la Réjyon é an mèm tan fé tout pou goumant lo kou d’la vi-Vi kroi nou rényoné ni pé z’ète kontan oir in prézidann réjyon apré goumant son salèr ziska 6800 € par moi.-Sa sé d’larjan sa !
Vi kroi nou rényoné lokatèr, ni pé z’ète kontan oir siprime lo lalokasyon lojman pou an avoir in mézon a soi. Z’ète kontan kan lo léta i plime bann rotrété an goumantan la taks dsi zot. Ranshéri lo kou d’la vi épi an avoir lo kilo di bann jenn travèrs la ru pou gingn travaye l’ot koté.
Alor matant di amoin kisa la sème lo van si la pa la bann Macron épi son bann konplis isi La Rényon ? Kosa ou i di amoin va mate la révolt. Biensir i pé mate in révolt mé dizon sé do fé va kouv dsou la sann ziska ké li ropran. Tok ! Pran sa pou ou !