Mésyé, médam, la sosyété, koz avèk moin sé koz avèk in kouyon-sé o py é d’lo mir k’i oi lo mason. Si zordi moin té plis an form pétète moin noré fé in fab dsi la rout é dsi lo train, dsi lo rosh déor épi sète isi, sète néna é sète na poin. An touléka, mi pans Paul Vergès téi vé fé in train é ansèv bann rosh landroi va tiré pou fé la rout litoral : ni pé apèl ali Lo saj pars arienk in saj i pé trouv in solisyon sinp pou fé inn-non pardon éskiz-dé kalité transpor, inn rout litoral, l’ot tram-train. Mé Didier Robert-ni pé apèl ali lo fou san égzazéré,- plito ké dé li la désid fé inn pou lo pri d’dé. Pardon éskiz : pètète pou fé in domi-rout. Lo moun la donn tor lo saz é lo jenn fou lété vinkèr dsi tout la lign.A ! Téi falé oir ali fète sa : li koz gra, li kour, li galop, li lish la min son mètr an déor, sak i grate ali dsou kolé, li promète, li va fé si, li va fé la. Élas Ménélas mon kèr lé an filas é oila l’èr d’la vérité i tard pa arivé.O pyé d’lo mir konm i di i… Alé ! Mi kite azot rofléshi la dsi é ni artrouv pli d’van. Sipétadyé !