Le roi martin Sintandré nana touzour bon-bon kozman dann son boush... mantèr dan la plipar d’ka, mé sof kant in kozman lé kalou, i fo rokonète li lé kalou mèm si i di sa pou manipil kréol, pou manipil galman sak i suiv ali, "a l’insu d’zot plin-gré". Ni an souvyin "valiz l’arzan" pou la défiskalizasyon, lo "koup pa nou" pou la bi-départmantalizasyon, lo SIVOMR "ponp-a-frik", étsétéri-étsétéra la ké lo ra… zordi son list pou zéléksyon i nonm "La Réunion, nout fyèrté".
Lé byin zoli, sof ké sé in pomade ankor in kou, sé la pintir, sé in fason sèy roul anou dan la bou. In sèl légzanp i sifi pou amontr ziska kèl dégré La Rényon sé son fyèrté : zot i ansouvyin kan li lété kont l’égalité sosyal, é li té pou la parité, é kan li la nyabou fé aval koulèv-la Jacques Chirac ? Li la pa fé aryink sa, vi k’la-ba, dovan bann dépité, li la tir in pil plate épi li la di banna, si i vèrs toute z’alokasyon, bann Rényoné va aryink boir lo ronm an plis. Ala koman li lé fyèr bann Rényoné, plis fyèrté k’sa lé pa possib, plis fyèté ksa ou i tonm a-tèr.
Méssyé lo roi martin, out parkour lé aryink konmsa ; ou la baz oute karyèr déssi la manipilasyonn moun, kan té pa sinploman déssi la frode éléktoral, avèk out bann nèrvi... a par k’sa, fyèrté pou fyèrté, nout sèl fyèrté s’ré d’fé gingn aou in bon sak lo kou. In sak lo kou éléktoral, byin antandi !

 Justin